طريقة عمل عيش السن
المقادير:
كوب و نصف دقيق أسمر ( دقيق كامل الحبه ) – كوب رده ( نخاله ) – كوب ماء دافىء للعجن ( ممكن يزيد شويه حسب نوع الدقيق ) – ملعقه صغيره سكر – ملعقه كبيره خميره فوريه – رشة ملح بسيطه – شمر – يانسون حسب الرغبه
الطريقه :
1- نضع الخميره مع السكر مع نصف كوب ماء دافىء و نقلب و نتركها حتى تتفاعل و تعمل فقاعات .
2- نضع الدقيق الأسمر مع الرده مع رشة الملح مع اليانسون ( إختيارى ) و نقلب جيداً ثم نضيف له خليط الخميره السابق و نعجن و نزود ماء دافىء حسب الحاجه ، حتى تتكون عندنا عجينه طريه سهلة التشكيل .
3- نضعها فى وعاء عميق و نغطيها و نتركها تخمر حوالى ساعه أو حتى يتضاعف حجمها .
4- نقطع العجين إلى كور صغيره و نتركها تخمر 15 دقيقه أخرى .
5- نرش رده على الرخامه و نفرد الكور بالنشًابه مع رش رده كمان على الوجه و احنا بنفردها و نخليها اقراص رفيعه .
6- توضع الأقراص فى صاج مرشوش رده ، و نتركها 10 دقائق ترتاح و بعد كده تدخل الفرن .
7- بعد حوالى 10 دقائق نجده انتفخ ده معناه انه بيستوى .
8- لو عايزاه طرى طلعيه من الفرن ، لو عايزاه محمص خليه شويه بسيطه زياده لحد ما يتحمص
9- يقدم ساخناً و بالهنا و الشفا .
10- ملحوظه لنجاح عيش السن معاكى :
لابد من أنك تكونى مختاره نوع خميره كويس علشان تخمر معاكى و دى حاجه مهمه جدا– درجة حراره الماء تكون دافيه ، اقرب حاجه بسيطه للسخونه ، لكن مش فاتره علشان الخميره تنشط ، و مش سخنه علشان لا نقتل الخميره– كمية الماء تعتمد على نوع الدقيق يوجد دقيق يمتص كميه كبيره من الماء و يوجد دقيق آخر لا يحتاج لنفس كميه الماء لذلك دى متروكه لتقديرك أنتى أثناء العجن – التخمر فى الشتاء بياخد وقت أطول علشان كده لا تستعجلى بوضع العيش فى الفرن قبل ما العجين يخمر – مش بياخد وقت طويل فى الفرن .
تحياتى م/ نجلاء يوسف
.
